Hindi patas ang access sa global individual stocks para sa iba’t ibang antas ng buhay ng Pilipino.

Kapag mayaman ka, mas madami kang options. Kaya mong mag-maintain ng foreign bank account, magpadala ng mas malaking halaga, sumalo ng wire fees, mag-comply sa kung anu-anong requirements, at maghintay kahit maging komplikado ang proseso. Kapag may problema sa isang broker, may pera at kakayahan ka para humanap ng ibang paraan.

Pero kapag ordinaryong Pilipino ka na gusto lang magsimulang bumili ng maliliit na piraso ng mga world-class companies tulad ng Apple, Microsoft, Nvidia, o Google, ibang usapan na iyon.

Ang totoo, ang mga naging popular na platform sa mga ordinaryong Pilipino ay hindi naman sumikat dahil luho sila. Sumikat sila dahil sila ang pinaka-practical. Madaling magbukas ng account, mababa ang panimula, at may fractional shares. Iyan ang dahilan kung bakit naging attractive ang eToro, IBKR, at GoTrade sa maliliit na investors.

Masakit isipin na may mga brokers naman na may access sa global stocks, pero ang setup ay pang-institutions lang. Ibig sabihin, may access ang malalaking players, malalaking kumpanya, at mga institutions na karaniwan ay kontrolado o pag-aari ng mayayamang Pilipino. Samantalang ang ordinaryong investor na gusto lang bumili ng ilang pirasong shares ng world-class companies ay hirap na hirap makapasok.

Diyan mo makikita ang malaking diperensya.

Kapag mayaman ka, may direct access ka o may paraan ka para magkaroon nito.

Kapag ordinaryong Pilipino ka, ang inaasahan mo ay iyong mga broker na madaling buksan, madaling pondohan, at puwedeng bumili ng fractional shares.

Kaya kapag ang mga practical na options para sa ordinaryong Pilipino ang nawawala o napipigilan, hindi ang mayayaman ang pinakaapektado. Sila pa nga ang may ibang daan. Ang pinakaapektado ay ang ordinaryong Pilipino na maliit lang ang kapital, maliit lang ang buwanang naitatabi, pero may malaking pangarap na makasabay sa paglago ng global market.

Ito ang hindi patas.

Sa papel, puwedeng sabihing “open naman ang global investing.” Pero sa totoong buhay, hindi pantay-pantay ang access. Ang may kaya, may paraan. Ang may institution, may access. Ang ordinaryong Pilipino, kapag nahirapan ang access sa mga practical na platform, lalong nasisikipan.

Ang mayaman, may access pa rin.

Ang ordinaryong Pilipino, mas lalong nahihirapan.

Kung talagang gusto nating umasenso ang mas maraming Pilipino, ang direksyon sana ay hindi ang lalo pang pagsikip ng access sa global individual stocks. Ang dapat ay mas dumami ang ligtas, legal, at practical na paraan para kahit ang maliit na investor ay magkaroon ng patas na pagkakataon na maging part-owner ng world-class businesses.

Dahil ang oportunidad na mag-invest sa global market ay hindi dapat para lang sa mayaman.

Ang tanong:

Kapag ang direct access sa global stocks ay nagiging para lang sa may malaking kapital, may institution, o kayang sumalo ng komplikadong proseso, patas pa ba iyon?

Facebook: https://www.facebook.com/share/p/19v4N5BDee/